حــيــرة
يا مركبة في بحر هايج رايحة فين
وانت قدامك بدل الطريق... طريقين
والعقل ثابت.. فوق دفته.. مختار
اليمين
والقلب عاند، واختار الشمال مرتين؟
يا مركبة ليه تخرجي وفوق رياستك ريسين
تتوزعي ما بين آرائهم، واحد شمال
والتاني يمين
وانا في بحرك.. عايش كما .. الغرقانين
واصف ملامحك، للأرض وللسما
مرسومة فوق توب أسود حزين ... حزين؟
يا مركبة الوقت فات، ع الحيرة دي من
سنين
ياللا اصحي بقى من السبات، طالة عليك
بدل العين.. ألف عين
يمين شمال، شمال يمين.. مش ممكن
يتجمعوا الاتنين
ولا ممكن تفضلي واقفة في شطك
مربوطة بحبل الخوف الإيدين
يا مركبة في البحر سؤال
إجابته مش هي الأنين
ولا ميت ألف واحد قال وقال
هتسمعي لمين منهم ولا لمين؟
يا مركبة كفاية ارتجال
واختاري ياللا ما بين الطريقين
وحددي ف إجابتك ليه الرحال
وفين ولمين، ومع مين
واوعي ف حياتك تخافي السؤال
من خاف تعب، وشرب
بدل المر... مرين
يا مركبة .. يا مركبة
إرسال تعليق
هنا نستقبل تعليقاتكم الإيجابية وآرائكم البناءة
شكرًا مقدمًا